(...! آشرحلي شن معني آحساسي’ رواية بقلم من حيآتي

بسم الله الرحمن الرحيم 

آشرحلي شن معني آحساسي

 روآية عشتهآ قبل مآآنحكيهآآ ’’,, حسيت بكل لحظة {.. حزن  , فرح , شوق , فرآآق , تعب , ملل , دموع , حب , صدآقة , خوف, وآآلاهم توبة  ..}

لو نرجع لبدآية سردي لقصتي , آو للحظة اللي غيرت كل شي , آكيد مش حنتوقع آني نكون بعد هالوقت في هالمكاآن 

غرريب ....

لكني مرتآآحة , مازلت في نص الطريق , لكن عزمي وبآآرآدتي حنوصل 

بعت كل شي , كآآن في عيني غآآلي 

وحنبيع , لاني حددت خياآآري 

أرضاء ربي عز وجل 

--------------------------+++++++++++++++++-----------------------------------------

لما توصل للحظة اللي معآآش تفرق هل هي البدآآية آآو النهآآية 

كل شي نفس الشي 

فرآآآآآغ .....

ماعآآدا من آآلفرآآغ تبني حلم جديد ^^_

العناد حاجة غريبة ونوعا ما مش مفيدة أغلب الوقت  , لان نحنا لما ننحطو في موقف عناد تعتبر افعالنا غير  ارادية آو مثلا كآنك معصب ومش متحكم في روحكـ , فاحسب الموقف ممكن تكون متحكم في آعصابك ويمر الموقف علي خير آو تكون نفسي حبيت تعاند وتجرب شي جديد تحت خيال انك مش حتغلط وحتعرف تتصرف !!

اللي حاسة بيه توا وملخبطني بدا من سنتين تقريبا او اقل , ماحسبتش بالزبط لكن  ومع انه في منه اللي نادمة عليه الا شي واحد حلو وغريب, نبيه ومانبيهش , كل شي عكس بعضه شعوري وتصرفاتي اللي ممكن تكون من فراغ او من جزء مني مازلت ماتحكمت فيه ,

في رمضان العام اللي فات , مش حنزبط اليوم لكنه كان في شهر 8 نهايته سنة 2011 كنت مسافرة وكانت بلادي في ظروف , ومع الساعة 9 في اليل فتحت ايميلي , ليا يومين كيف قدرت نفتح ع الوايرلس و في نفس اليومين هادو كنت نفتح ايميلي اللي غبت عنه 8 شهور , وكان سبب فتحتي الوحيد "هو" !!!!

آول يوم تقريبا مالقيتاش اون لاين بس تاني يوم زبط وفتح لكن فرحة ماتمت لانه سكر , حطيتله عذر اني مش طالعة عنده او ,غيره المهم كان حاط صورته وآكيد خديتها طبعا وكان حلو الا انه كان واضح قصده منها ومن حركته اللي مدايرها ومع هدا عجبتني ....آكيد درت بلوك لناس وناس ماباش يندارلي وايميلي التاني مسحت اللي فيه كلهم " وهدا سببه العناد ""

المهم في اليوم الثالث ممكن, فتح من جديد وكالعادة طول باش كلمني , الحق اللي فكرت فيه وقتها وشن اللي خلاهـ يطول كل هالوقت انه اللي عنده سكروا او انه كسد ومالقاش الا انا , مع انه من قبل كان يقولي لا انا مش هكي , بس كنت نعرفه كنت نعرف تصرفاته كل شي كان واضح ’ بس بشك وديما في بالي مرات وممكن ان انا تفكيري مش كله صح , عادي الكمال لله وكل واحد عنده اسراره !!!

شفت صورته وقتها اكثر من مرة وكنت نشوفها بسرعة ونغير كانه بجنبي او كاني مانبيش نبين اني مستاحشته , وشفت الاكونت متاعه ع الفيسبوك من اول ماتسكر النت عنده يعني من شهر 3 الي حد وقتي توا ....كان من النوع اللي مايبينش كل شي علي صفحته .كنت نبي نشوف لو في بنت في حياته او حب جديد آو حتي شن آخبارهـ العادية !!! ؟

كلمني وكنت معصبة منه بجد كيف ان تقريبا حنسكر ساعة وتوا كيف خطرله يكلمني ..قالي كل عام وانتي بخير "( ههههه ضحكني كلامه حسسني اني معاه امس وامورنا تمام , نسي اللس صار!") سآلني نسيتيني ؟؟!!

وقتها بجد عصبت , آنا نقدر ننساه معقولة , اصلا من الاساس كيف خطرله ننساه , صح مرو آكثر من 6 شهور كاملات لكن لو مرو سنين مش حنسساهـ !!

حاولت نتحكم في روحي ونبين انا تمام ماقدرتش ورجعت كلمته

آنا : شن حيفرق

هو: آكيد حيفرق ..

نبي نغير الموضوع ونذكره بالفترة اللي مرت وانه المفروض يسال كيف حالي ان عايشة او لا , وهل انا نفسها البنت صاحبة الايميل !

آنا : انت عارف اصلا انا من

هو : آكيد , آنتي (....)

آنا :ايه وكيف متآكد

هو: عارف وخلاص ...بس جاوبيني نسيتني ولا لا ؟

طريقته تعجبني بالنسبة لغيري حتكون عادية او أي شي لكن , لكن كل حد يشوف الناس بعيونه

آنا : مادامك عارفني معناها عارف جوابي وعارف شن حنرد !

هو : ايه عارف بس نبي نتآكد

مرة قريت ان هلبا ناس تقول كلام وفي خاطرها غيره

كآن تشوف حد تعزه سواء كآخ او صديق او حتي كحب ويبدا صاير بينكم شي كسر هالرابط وتبدا خاطرك تقوله نبدو من جديد او استاحشتك او حتي كيف حالك كنت خايف عليك

انا كنت خايفة عليه وعلي صارله وزعما شن دار في الشهور اللي فاتو هل اهله بخير وهو مازال زي ماهو , وكيف صحته او حتي قرايته أي شي كان شاغلني مع اني كنت حاسة انه تمام والحمدالله

آنا : لا مانسيتكش . ( بكل بساطة , تقريبا هدا كان ردي مش متذكرة بالزبط لكن هدا الاساس )

هو : باه كويس

آنا : نجحت ولا لا . ( ومع انه رده حطمني )

هو : وبضحكة سمايل مازلت ماشفتها تصوري

سآلته كيف حاله رد تمام وبعدها اطريت نسكر كان خاطري نزيد نحكي معاهـ , كان في خاطري ان اول مرة حنكلمه بعد هالفترة حتكون غير لكن !............. 

بعدها طلعت انا وخوتي كان الجو حلو ..كانت مصر في رمضان روعة وبالاخص في الاسكندرية المكان اللي انا فيه .....كانت بسيطة بناسها وبطريقتهم وكيف انهم راضيين بعيشتهم وكيف تصرفهم ..وكيف تعاونهم معانا وبالاخص بعد احداث 25 يناير فااحساس ولا احلي

ومع ان مزاجي كان مش تمام الا ان الجو خلاني ننسي ولما رجعنا لشقتنا ..ولان ماما مسافرة وبابا هوا اللي معانا فاانا وبما اني الكبيرة توليت موضوع  السحور , ساعدني بابا وآكيد الجو ماكملش الا بالجزيرة لان الاجواء كانت خيالية في بلادي وبالاخص بعد التحرير الحمدالله الوقت كان في العشرينات من شهر 8 ,

لما جربت اني نرقد كان تفكيري بين اتنين بين اللي درته من قبل واللي صار اليوم وبين المناظر الحلوة اللي شفتها من غرفتي , كانو الناس في مصر مايعرفوش" النوم " ابدا مواصلين 24 ساعة وكان الحب بين المسيحي والمسلم متناغم كانو يساعدو في بعض وريحة الحلويات جنان بالنسبة لمحبي الماكلة نفسي آآكيد , والمقاهي وصوت البحر والاغاني المتواصلة للصبح , كنت ع الأغلب نستغني عن موبايلي ولاب توبي ونسمعلهم , وانتقالهم من بين ام كلثوم ونانسي واليسا للشعبي , واكثر من اغنية ذكرتني بيه , وبالاخص آنا اللي الذكريات من آهم سنيني وتآخد آغلب وقتي

كلمت ماما واختي المسافرة معاها واطمنت عليهم وصحبتي وكيف الاجواء والناس في بلادي حبيبتي ووفرحتني بكلامها , وللحظات حسيت اني معاها واكيد متابعة جديدهم ع الفيس وع الاخبار اللي انا مش من معجبيها الا ان للضرورة احكام .....

لكن رجعت من جديد ليه كيف اسلوبه اللي حيرني ,, وهدا اخر ماتذكرته لاني   رقدت وماحسيت بشي بعده ^_^

مر اسبوع من اخر لحظة حكيتها وكان اليوم اللي جاي يوم عيد الفطر , مافضيتش للنت ومافتحتش لكن مرة مرة ع الفيس يمكن حد من قروبي نشوفه , وكان في اومي ( اومي كان شبوب طيب بلا حدود ومحترم تعرفت عليه السنة اللي فاتت وكانت في نفس الوقت وفي رمضان او قبلها بشوي ..آحداث غريبة جمعتنا وبجد احساسي ليه كانت عنوانه الاخوة وبس ...احترامه حسيته  انبني بروحه ومع الوقت وكان مخليني علي اطلاع بكل جديد واول باول ..كان بجد يضحكني وبتصرفاته وبالفيديوات اللي يصورها وفي ساحة التحرير والاحاسيس اللي يوصفها ليا ..كان يقولي انهـ يصور باش يوصل اللي في بلادي للمغتربين نفسي كان يحسسني اني نبي الطلعة او بسبب تاني لكن كنت نرد ونقوله اني نبي مية مرة في الدقيقة اني نكون معاهم وفي نبض عاصمتنا .ومن تعليقاتنا علي الصور والفيديوات والكاريكتر للعقيد وعلي الطحالب اللي بجد وقتها وبكل لحظة مش حنوصف شعوري بكلام , حبيت بلادي للمليون ’ حبيتها لاول مرة , حبيت شباب وبنات بلادي , حسيت بواجبي ليها وقداش انها تستاهل , لو رجعتلها استحالة نسيبها كانت لحظات ,سبحان الله ,و لاآحلي وفي الشهور اللي فاتو وكيف كنا خايفين ودعواتنا كل شي كل شي لو نبي نحكيه حياخد طول عمري باش نوصف قداش كان ولا في الخيال ....

وبمرور اليوم وفطرنا وطبعا متحملة مسئولية خوتي 3 وبابا وكان يوم حلو لانه اخر ايام رمضان .هاليوم الاسواق تكون مليانة ناس فرحانة ناس تعبت عشان تشري وناس تشري بدون اهتمام لكن يجمعنا ان غدوة عيدنا عيد الفطر , كنت تحس باحساسهم لما تشوفهم يضحكو ومبتسمين ولما تشوف اب يختار لصغاره تذكرني بابا وماما زمان .لما نشوف عوائل من بلادي حتي هما في نفس المكان ..في مهم اللي هرب من وقت الاحداث وفي منهم من جا  تغيير لنفسية العيلة ..لكن كلهم فرحانين والمطاعم والمقاهي كل شي كان حلو ..سواء بسيط او فخم كل شي كل شي كان روووووووعة__^

وفي طلعتنا مشينا ع البحر وكان معاي خوتي كان الكبير فيهم اصغر مني بسنتين والتاني اصغر مني بست سنين , كانو حلوين وكل واحد يحكيلي شن شعوره وشن يبي يدير غدوة ويهدرز لي علي أي موضوع , كانو نعم الاخوة بجد كان االكبير فيهم غيور ويخاف عليا , كنت نضايق مرات من روحي لاني فاتحة الفيس لانه هوا معنداش في الحاجات هادو وبالاخص انه مايحبهمش عشاني عشان ديما يقول هدا مش جوي ونخاف علي اختي ....كنت نبي نغير وعارفة اني حنغير روحي لكن كنت نراجي في الوقت " المناسب" اما خوي التاني فهو آحن ماشفت بجد زي ماقالو كل واحد يشوف الناس بعيونه لكني نحبهم نحبهم بلا نهاية هادو احلي مافي حياتي *__

وجا يوم العيد مر بشكل حلو من بدايته لنهايته مرينا علي ناس تعرفنا عليهم وجو الضيافة وكيف الناس والعالم كلهم يعيدو علي بعضهم وكل حد سوا كان مهموم او عنده مشاكل فهاليوم تلقاه يضحك وناسي كل شي ,, ربي كبير واللي خلقنا مش حينسانا ......" الحمدالله"

اليوم اللي بعده كان موعد رجوع ماما ,واستقبلها بابا من مطار القاهرة ورجعلنا مرة تانية لــ الاسكندرية , وشي طبيعي كان همنا انا وخوتي الهدايا وشن صار في سفرتها اول شي نبو نعرفوه واكيد نحكولها كل شي صارلنا ^_^

مر تقريبا 4 ايام ماما شافت المكان شوي لان من جيتنا لمصر قعدت يومين وسافرت طول هيا واختي فلما رجعت , آختي تبي تشوف كل شي شفته انا وكانت اصغر مني بـ 7 سنين ( لايخلي الفرق من الغيرة والمقارنة بينها وبيني ) فكانت تحب تدير وتاخد أي شي نديره وناخده ........

بعدها سافرنا للقاهرة لتكملة رحلتنا وكان المقرر نقعدو فيها 3 او 4 ايام لان كان موعد القراية في بلادي حيبدا وبطبيعة الحال ولان في مدينتي كانت القراية متوقفة عنا لمدة 6 شهور ومعظمهم وصل لنص السنة فاضروري يلحقو وباش يواصولو مع السنة الجديدة .......

في سفرتنا للقاهرة وفي طلعاتنا كانت غير يمكن لاننا قعدنا في المدينة او لان مافيهاش بحر نفس الاسكندرية فماما ماعجبتهاش , لكن انا من النوع اللي كل شي حلو عندي وعادي فكنا في الصبح يمر اليوم عادي وبدون طلعة  وبالاخص الجو والشمس والضغط وفي الليل طلعاتنا " آكيد هالكلام موجه لي وبس بس تقريبا ماما وبابا طلعوا " ^__ , ومرة او مش مرة تقريبا طول القعدة وانا مواصلة ع النت 24 ساعة لدرجة نرقد تقريبا 6 ساعات بس وهدا غريب مقاربة بيا ومعدل نومي الطبيعي 12 ( #_#) غريب عارفة ويسموني مهووسة SLEEPING

فكنت نبي نحكي معاهـ ضروري ’ كان خاطري يحكيلي شن صارله او علي اخر موقف بيناتنا ومن الغلطان انا ولا هو , وشن صار لكن لا شي حدث يمكن انا حاطة اهمية للموضوع وهو مش معطيها أي شي يذكر , وفي هالتلاث الايام اللي قعدناهم حكيت معاه مرة وكانت كافية علي اني نفكر نحكي تاني , خسارة

مع الساعة 3 بالليل وعارفة ان هدا غلط ومش مفروض نسهر او اني نكون نكلم اصلا بهالوقت لكن كان يومي معكوس والجو في مصر يخليك ماترقدش فماكنش للوقت قيمة .وكلمني وحكينا شوي كنا حنبدوا نتعاركو الا اننه قالي شوي ونرجعلك وحكينا ماخداش حتي نص ساعة من بين اللي صاير ع الفيس ومن الاغاني اللي نسمع فيهم توا وماباش يجيب أي سيرة عن اللي فات ؟!!

قلتله قبل مايقولي شوي ونرجعلك في اغنية حلوة اسمعها كانت لفاضل او فضيل مش عارفة بالزبط واسمها مليون غيركـ كانت عاجبتني  وهوا قالي شن نقصد بيها الا اني ماقصدت شي ورد بعدها انه يدور علي اغنية وطنية طلعت في الاحداث "آآآآوووو بنغازي "" وجربت ندور لكن مالقيتهاش .فلما مشي كملت نشوف شن الجديد وكنت مسجلة في لعبة اون لاين جديدة للبنات وطلعلي مسج ان اومي حمل فيديو جديد ويبيني نشوفه عن ساحة التحرير ولان اومي بطبيعته انسان حبوب فتلقي روحك مسرع ماتندمج معاه بالكلام وبدينا في التعليقات انا وياه وكيف الجو عندي وعن خوتنا الليبين في مصر وهو عن الجو عنده وشن الجديد واللي صدمني  , رد بتعليق هو رد كان قايلي وقتها ع الايميل شوية ونرد , كنت نستناهـ بس لقيته قبل مايحكي معاي ع الياهو او يقولي كملت لقيته علق ع الفيديو , حسسني وقتها انه بقصد وبالاخص نص التعليقات كانت ليا ولي اومي ..وبحركته هو اللي يدير فيها الجديدة " لوووول " 

كيف قالي شوي وبنرجع وهوا ع الفيس بجد عصبني لو غيري حيقول مل ويبي يدير حاجة تانية او انه بجد بعد ماكمل اللي كان بيديره رد ع الفيس قبل لكن , لكنه ماكلمنيش الا بعد مافصل النت وطلعت اوف لاين ورجعت تاني اون لاين ورد عادي وانتي مازلتي قاعدة ولا رقدتي

المفروض شن نرد او نقوله اني نستناهـ او انه علق ونساني او او , بعدها كان جونا مش تمام انا كنت نبي نبين اني متضايقة ولكن لاني من النوع اللي مانحبش نحاسب حد لان الكذب او المجاملة لو حد فكر يدخلها في ردهـ مش حيوحل او يتعب لانها ساهلة وبالتالي فنحس اني عطيته فرصة باش يطلع عذر " كاذب" .....وقال انه بيرقد قلتله اقعد وكسد معاي لكنه قال تعبان والساعة قريب 4 وبيرقد !! آوك تم ,قالي انتي غريبة خيرك شن في قتلته انت تدير في حاجات تعصب انت مش عارفة كيف "والمشكلة نعرف حركاتك" لكن انسي مش وقته , قالي براحتك وتصبحي علي خير !!!!!!

وقتها مسحته طول وبالصدفة انمسح من قائمتي حتي قبل مانديرله" اقنور " كرهته , كرهته لحركته ’ كرهته لكل شي

خطر في بالي كيف اول ماوصلت لمصر بايام واول ماجابلي بابا الشفرة اول واحد لما فتحو الاتصالات ببلادي خطرلي نتصل بيه اول واحد !! حتي قبل صحباتي ورنيت لكن ماقدرتش نكلمه وسكرت

كيف اني فكرت فيه وكيف وكيف وكيف وكيف وصلت للحالة اللي انا فيها !!!!

\/

\/

\/

\/

\/

\/

\/

\/

\/

كل شي بدآ بعناد ....!

عناد سببه الاساسي ماما !!

عناد آني نبي نجرب حاجة جديدة مع انها عكس قناعتي , عناد آني نبي نكون نفس غيري , مع آني آنا غير !

عناد آني نبي نحب , نجربه زي مانشوف في رواياتي وافلامي اللي نحبها !

لكن العناد فادني بطريقة عكسية جت بعد وقت !

بدايته بعناد ماما لي في هلبا حاجات من بداية عمري وللمرحلة اللي كملت فيها الثانوية كنت بنت بابا , كنت بنت ماشية صح , ويهمها كلام الناس , وضروري اني نكون قدوة لغيري من البنات والاهم نسمع كلام اهلي كنت هادية من صغري<  مع آن داخليآآ بنت جريئة الا اني كنت نخاف مانرضيش اهلي, فكنت مؤدبة وذكية ومحترمة في لبسي واسلوبي وكل شي , حتي آني ومن بداية استعمالي للنت مافكرتش نفتح شات أي مرة لاني عارفة اني حنخسر ثقة اهلي او ندير شي يغضب ربي , ......

لكن العناد غيرني وفادني بعد وقت ,بعد وقت طووووووويل

!!!!!!!!!!!!!!!!!!!!!!!!!!!!

من بدايتي في الجامعة وعالم جديد علي كنت في الاول همي قرايتي وبس وصحباتي واني ممكن حنحب زميل لي وحتكون قصة خيال " كانت كفكرة مرت مرور", لكن طبعا استمر لايام بس بعدها طولت ع النت ’ كنت اغلب وقتي عليه

سواء قعداتي مع صحباتي او قعدتي ع الفيس ,

في الصيف اللي سبق دخولي للجامعة صارت تغيرات بشخصيتي ولبسي وبدا جانب الجراءة يبان وبدت ماما تخاف عليا اكثر من لما عرفت ان واحد من اولاد اقربائنا يبي يكلمني ومن لما بديت في نظر العيلة اني كبرت ومن مواضيع الشباب في حياتي ولاني من قبل ماكانش لهم أي وجود %_

ومرات قبل مانعرف باعجابه ليا كنت ع النت في حديقتنا وكان قاعد   مع اولاد عمامي وخويا يلعبو وكم مرة جمعتنا لعبة او قعدة وحكينا, اختي الصغيرة كانت تقولي خيرله يشوف فيك ديما ومبتسم او ديما يضحك معاك كنت مانعدلش لانه اصغر مني SO  كان عادي وحتي لو انه مرات يبدا يكلم قدامنا او يعطيني موبايله باش نشحنه او يساعدني في حاجات , لكن عادي

فا في قعدتي ع النت وقتها كان في واحد ضافني ومن تعليقات من هنا ومن هنا  كان الولد طيوب ومن النوع اللي تحبه طول شخصيته ناعمة وتحسه حنون واسلوبه محترم ومن طريقة كلامه الهادية وديما رومنسية , غيري حيقول انه يلعب او هدي شخصية من شخصيات الفيس الصيادة لكن لو عرفته زي ماعرفته حتغير رايكـ .. فمن تعليقاتي علي صوره مرة قالي انه معجب بيا وبعتلي ارتباط

طبعا انا كان الجو جديد عليا وحبيت نجربه وبالاخص وصحبتي BFF من شهرين كيف خشت في اول علاقة ليها لانها نفسي او كانت نفسي كان مايهمهاش هالمواضيع , فرفضت كم مرة وان انا طبعي مش هكي وطبعا كان رده الطبيعي عارف وعشان هكي حسيتك غير , ومع هدا ولانه كان كويس وكان محبوب من الاكثرية من الفريندز فقلتله انو اوك حنغيرو صداقتنا لشي اكبر لكن مش ارتباط , وكبر هالشي واستمر لبداية الجامعة الا اني وبصراحة كان احساسي اعجاب يمكن او لانه اول تجربة شي اكبر من صداقة , مش تجربة حب لكن مانعرفش

وآكيد صحباتي علي اطلاع بكل جديد يصير وهدا سبب اعجابي بالفكرة انه في شي جديد وشي جمعنا انا والبنات >>> لكن واحساس كان يقولي عن الصح ا لا اني تجاهلته كان عاجبني الطريق اللي ماشية فيه !!!__!!

وبداية جامعتي كنت وقتها مع ماما مش متفقين نهائيين لانها معظم الوقت مانعة عني النت وبالاخص لاني تراجعت في مستواي الدراسي بنسبة واضحة , وكانت تراقبني وممنوع نسكر غرفتي لوقت طويل او قعدتي بروحي , كانها حاسة اني متغيرة و, وآنا كنت متقصدة تحس وكنت نبينلها باكثر من طريق

كانت تقهرني بثقتها النص ثقة اللي عطيتها ليا , وماما من النوع اللي يحب ويبين حبه بالخوف ولان بابا كان قريب مني فكانت تلجآ ليه باش يحكيلي عن الجامعة وعن الشباب ويحاول انه يحافظ علي بنته دلوعته الا ان عنادي لماما كان اكبر وكنت عارفة ان مصدر كلام بابا منها هيا فكنت نزيد نعاند !!!!!!!......

فوقتها بديت مرة مرة نكلم في ولد عمي وكان في نظري حلو مع انه وعاودتها للمية مرة ليه ولنفسي انه اصغر مني الا انه كان يقول عادي ....وماما كانت عارفة انه يبيني او انه حاطني في راسه فكانت تكرهه كرهـ مش عادي وانه مش  شاطر في قرايته وكيف انه شاب يتبع الجديد في جيله وبالاخص انه طايش ومع هدا كنت نصر علي اني نكلمه مرات وممكن هدا سبب اعجابي بيه اصراري نعاندها!

اما الشاب اللي علي الفيس(({ فؤاد})))  فكان مش ديما يكلمني وكان في مسجاته يقولي انحبك وان انا حبيبته وكان رومنسي الا اني كان عادي عندي , صح في جزء يعجبه هالكلام مني , الا انه ع الاغلب عادي وكان كلامنا بالاكثر ع الفيس ولاني نفتح فيه لوقت قصير عشان ماما مانعة النت ##

مرة وانا ع الفيس انتبهت اني حاطة الايميل بميزة الاظهار يعني يبان للكل وانا الفريندز عندي كان عددهم كبير فاغيرت ايميلي لايميل جديد وهدا رابع ايميل نديره .....

الاول كان من سنتين وصحباتي بس اللي فيه وقتها كانو الشباب نقطة مجازفة عندي وخط احمر !

التاني والتالث والرابع للفيس ولان المسجات هلبا وفتحت النت ع لاب توب كانت ممنوعة اغلب الوقت فلما يوصولو مسجات الياهو لاكثر من 2000 ندير واحد جديد

! فاكان عندي ايميل مليان طلبات اضافة فلما فتحته كنت مكسدة وكان الوحيد المنضاف فيه فؤاد , فوقتها ولان صدق من قال الكساد يعلم الفساد معظم الاوقات , فاوافقت علي الطلبات الـ ADD’S كلهم مع اني كنت نرفضهم .....بس فؤاد سكر وسكرت الايميل وغيرته ودرت واحد جديد ,وفي بالي اني مش حنفتح اللي قبله ونفوته !!

بعد شهر من اخر نقطة حكيتها ومازلت زي ماانا يعجبني أي واحد عنده فريندز هلبا واجتماعي وحبوب او نفس ستايلي وجيلي ...كنت لو نبي نصف روحي بجد ضيعت وقتي في اشياء تاااااااافهة , وآكتشفت هالشي بعد وقت ,

فكلمني ولد عمي , كنت جديدة علي هالاجواء كنت بجد جديدة ويمكن كان واضح , كانو البنات في جامعتي مرتبطين بارقام خيالية تحت شعار الحب .كان الحب لعبة ..وكانو الاولاد فاقدين الثقة فيهم والشعور متبادل وهمهم انهم من ارتباط لارتباط ..كنا لما نشوفو حد محترم نقولو اكيد تحت السواهي دواهي ....غريب نسينا نشوفو روحنا وآنفسنا ؟

فوقتها كانت الساعة 11 والجو ملل وشهر 10 , كانو الاشهر الاخيرة من السنة مملين , ونستنو امتي تجي 2011 , وبالاخص وامتحاناتي في شهر 12 وانا اخر همي قرايتي , مع ان ماما  توصي وبابا وصحباتي , لكن كنت ماشية في طريق مافيش له نهاية !!_

وفتحت ايميلي هاللحظة اللي غيرت كل شي بمعني الكلمة , سميتها بداية ضياع نفسي في تجربة او تجارب جديدة!!

كانو في اضافت ضفتهم وبدوا الاون لاين يبانو وشات ورا شات للساعة 12 , لدرجة دخت من كثر المعلومات والاسامي فسجلت كل اسم كل واحد ومواليده في دفتر وردي بجنبي اللي من المفروض انه يكون للمواضيع المهمة او البيانات اللي نحتاجها في الجامعة ولكن بما انها اخر همي فسجلت بدالها بيانات المهميين واللي مامليتش منهم في الياهو

واللي مليت منهم فتتهم ومن ضمنهم كان في " آسامة " من بداية كلامنا لنهايته غريبة

\\/\/\/\/\//\/\/\/\/\/\/\/\/\/\/\/\/\/\/\/\/\//

آسامة : هاي شن الجو

آنا : تمام وانت ( عادة مابهمنيش السؤال عن حال اللي نكلمه لاني نبيه يسكر ومايحكيش معايا ,  هالجزء كان كانه يبيهم كلهم يسكرو باش مانستمرش فلي انا فيه )

آسامة : باهي دوووم و عادي نتعرفو

آنا : حسب

آسامة : باه آنا آسامة مواليد 93 وانتي

آنا :آسيل ونفس مواليدك

آسامة عاشت الاسامي وبطولة عمرك

آنا : تسلم والعمر كله حتي انت

 آسامة : صحيتي , باهي يااسيل وين تقري

آنا : الجامعة توا وانت

آسامة : حتي انا .شكلنا نفس بعض

آنا : ايه الواضح هكي , باهي كيف وصلك آيميلي

آسامة : واللهي خديته من الفيس ..

آنا : اها اوك وعلاش ضفتني

آسامة : لانك ماتفتحيش شات الفيس وبعدين حكيت تقريبا معاكي مرة وعجبني اسلوبك وكلامك في بروفايلك

آنا : اها باهي شكرا وبالنسبة للشات مانحباش فهدا اعلاش  ( وكنت عارفة انه نفسه نفس غيره , او ع الاقل هكي كنت تقريبا حاسة )

آسامة : آها باهي كويس ’ 

آنا : شن المواضيع اللي عجباتك في صفحتي

آسامة : اهو ردك وكلام وطريقتك في التعليق خلتني نبي نضيفك وبعدين تباني شخصية غير زي ان انا مانحبش حد يخدعني فا انتي حسيتك بلكي غير

آنا : آيه آها باهي , آكيد حتي انا محد يقدر يخدعني او يجرب حتي

( من تعليقاتنا اللي جرت بعضها وعرفني علي نفسه ولاني عصبته و استفزيته في الكلام فكان رده )

آسامة : صار هكي باهـ شن رايك انا مش اسامة وانا حسام وانا مواليد 92 واللي عطاني ايميلك هوا فؤاد ( وحط فيس ايفل)

طبعا انا ارتبكت مع ان انا وفؤاد نوعا ما نفس او اكثر من علاقة الصداقة بشوي الااني ماحبيتش فكرة ان اسامة  سالني هلي حبيتي وانا جاوبته لا ماعمري ماحبيت وفكرة انه حيقوله الكلام اللي صار توا  ويقوله البنت اللي حبيتها وكاتب في صفحتك تموت فيها قاعدة تكلم في غيرك , بجد شعوري وقتها كاني خاينة خاينة لشخص طيوب مايستاهلش حتي لو مافي شي بيناتنا الا  اني خاينة كارهة نفسي والشخصية اللي انا فيها وقتها اتنرفزت مني انا من نفسي بس ردي كان غير 

آنا : وباهي مادمك انت حسام وانا هنادي ومش اسيل ومواليدي حتي انا 92 شن رايك شوف من خدع من توا ؟

آسامة : آهها هههههههههههههه   شفتي كيف خليتك تغيري كلامك وكيف خدعتك وانتي اللي تقولي مافي حد يخدعك هاهاهاهاهاهاهاهاهاهاها

آنا : هههع اعلاش تضحك وكيف خدعتني وبعتالي وكان فؤاد عطاك  انا مش اسيل وانا صاحبتها صدق ولا لا

آسامة : خخخخخ صار صاحبتها باهي باهـ بعدين ياصاحبتها انا ماكدبتش وبجد انا اسامة ومواليدي  93 وشهر 9 يوم 25 شن رايك والحق انه فؤاد ولا زي ماتدلع فيه صاحبتك اسيل فوفو هوا صاحبي

( آنا عصبت جد حبل الكذب قصير لكن انا شيطانة ونكذب لو احتاج الامر باش نبان صح ومشكلتي شاطرة ان نقنعك بمية طريقة لكن بااسلوبي )  

آنا : اوك باي بنرقد ومايهمنيش الموضوع وبكرا لما تفتح اسيل قولها اللي تبي

وسكرت بدا تفكيري يدير في خطة باش نطلع روحي صح وكلمت صحبتي وقلتلها شن صار بالزبط وكيف انه قالي انه هاكر فا في احتمالية انه يعرف مكاني او موبايلي او غير

المهم مارقدتش من كثر التفكير ومافتحتش الايميل ليومين

\/\/\/\///\//\/\/\/\/\/\/\/\//\/\/\/\/\/\/\/\/\/\///\/\/\/\/\///\/\/\/\/\///\/\\/\/

في الجامعة حسيت بنفسي خداعة وكذابة وانا نكره الكذب في الحب وبما اني ماحسيت بشي اتجاه فؤاد غير مشاعر الاخوة والصداقة ففكرت اني انقوله ولو هوا باني حلم نبينه له

بعد يوم من الموقف اللي صار في الايميل مع اسامة وبعد تفكير ,  وانا وصحبتي القريبة مني هلبا كنا في الكافتيريا ففكرت اني نكلم فؤاد ونقوله اللي نويت عليه

فهز موبايلي وبينلي ان فؤاد اون لاين فحسيتها فرصة وكلمته

آنا: هاي فؤاد كيف حالك

فؤاد / تمام ياعيوني كيف حالك انتي

آنا : تمام شن الجو في جامعتك وجواصحابك

فؤاد: اهو محاضرة اليوم نفخ وتعاركت مع الدكتور ودرت تعاهد , تعرفي يوم بايخ من اوله بس ياعيوني ننسي كل شي لما نشوف واصحابي يسلموا عليك

(صحابه هما اتنين الاقراب منه وهما صارلي معاهم مواقف ياما لكنهم نفسه طيوبين ومحترمين في الاسلوب )

آنا : ساهلة تو تمشي وعادي غير شد حيلك في قرايتك

لحظتها هزتني صحبتي وضحكت لانها قرت اخر كلمة وقالتلي حسستيني انك انت اصلا تقري باش تنصحيه انه يقرا

وضحكنا , هالانسانة  نحبها حب مش عادي بجد رغم بعض الحواجز الا  انها اقرب صديقة ليا

فرجعت بعد مارديت عليها وقلتلها تفوتني وتخليني نكلمه وبرد متحترم منها قالتلي تسيبي الولد عن طريق شات معقولة قلتلها هوا اصلا مايكلمش فيا تبيني نكلمه انا كيف تجي

!!!!!!

آنا : المهم فؤاد نبي نقولك حاجة بس عشان خاطري لو تحبني ماتزعلش

فؤاد: وانا نقدر نزعل منك ياقلبي انتي اغلي حاجة واحلي شي صارلي

طبعا كلامه مرات نحسه بجد صح غير مش كذب الا ان الحياة خداعة !!

آنا : فؤاد اللي نبي نقوله ان شعوري اتجاهك تقدر تقول اقرب للصداقة ومانبيش نكذب عليك او انقول انحبك وانت عارف انا استحالة انقولها الا لما نحسها وانا بصراحة مش حاستها

هوا مش اني نكرهك او غيره لكن نحنا استحالة نكونو اكثر من اصحاب

فؤاد : كيف يااسيل تبي تسيبيني وانا اللي انحبك ..كيف بندير انا

آنا : صدقني حتحت غيري وعادي الموضوع مايستاهلش

كان يرد ان انا اول حب وهوا مرة في اول تعارفنا قال انه ماحبش من قبل بس كان في اعجاب بالاعدادي بس وان انا اول حب , مع انه علاقتنا كلها بالفيس وكلمني تقريبا كم مرة ومش لوقت طويل وكنت نحطله في اعذار وماشافنيش ع الطبيعة ابدا فكيف كان يحبني , بجد رغم اسلوبه المحترم وكلامه وشخصيته الا اني ماصدقتش , البنات قالولي ممكن الحب يصير بدون انه مايشوفك ع الطبيعة وبعدين حتشوفيه مع الوقت او انه ممكن يكون من الناس اللي مايهمهمش الشكل , الا اني مازلت مش مقتنعة لاني انا استحالة نحب حد  بدون مانشوفه , ممكن نحبه كشخصية او غيره لكن الشكل مهم عندي ..وبنهاية كلامي وقالي براحتك وسكر وانا ارتحت الا اني كنت نفكر فيه بجد ياريت وقتها قلت ياريت لو نحنا غير لو نحنا نقدرو نحكو معاهم ع الطبيعة راهو ماكانش في كلام بالموبايل او احتياج للفيس وقتها يمكن عرفت بجد هل ممكن يكون في حب بيناتنا !!

فلما سكرت لقيت شلتي جت وبدت مواضيعنا المعتادة ..

بعد نص ساعة بدت محاضرتي الا اني محضرتهاش ومشيت انا وصحبتي BFF  نونة ( نهي ) فكانت هيا فاتحة الفيس عن طريق الاكونت متاعي ولانها ماعندهاش ع الفيس وانا كنت نحكيلها عن اللي صار بيني وبين فؤاد

"من كلامي كان خيالي يشيلني لمكان تاني قبل كم اسبوع لما اتصل بيا رقم غريب مرتين , مارديتش وقتها بس تاني يوم كنت في الصالة بجنب عيلتي وكنا نتفرجو علي فيلم رعب علي mbc2  فرن الرقم من جديد ورديت ولقيتها بنت فامشيت لداري باش نسمعها لان صوت الموفي عالي

آنا : اهلين ايه الحمدالله تمام وانتي

....: تمام حتي انا , انتي اسيل صح

آنا : ايه صح وانتي

....: آنا ابتسام واتصلت بيكي من طرف فؤاد

آنا : آها اهلين تشرفنا

ابتسام : تسلمي حبيبتي , ونبي نسالك انتي وفؤاد مرتبطين صح

آنا ارتبكت بس : تقدر تققولي حاجة زيه هكي ( رد غبي عارفة )

ابتسام : اها كويس لانه هوا شفته بكري لما طلع من الكورس وكلمته وسالته عليكي لانه ديما يحكيلي عنك وقداش يحبك وطلبت رقمك باش نكلمك ونتعرف عليك

آنا : تشرفت حبيبتي بيكي نعرف قداش يحبني لانه ديما يقولي ( مع اني مرتبكة لان اول مرة تصيرلي هاللقطة )

ابتسام : تسلمي ونعرف لاني قالي انك تحبيه واللي نبي نقوله لكي ردي بالك منه لانه ولد كويس وبجديات يحبك وديما يحكي عليك وفؤاد الناس كله تحبه وهوا ولد كويس ومشالله عليه لكن حسيته متضايق لان قال انه هوا يحبك اكثر وانك مرات مش مصدقته لكن لما شفته قلتله خلي الموضوع عليا وماتفهم البنت الا البنت ح ولا لا

آنا : اكيد نعرف , واللي قلتيه كله عارفته لكن في مواضيع عالقة

ابتسام : عادي كانه علي خاطر مش ديما يكلم فيك عادي ممكن عنده اسبابه او ممكن تتعاركة عادي راهــ حتي انا ورامي ديما هكي وهوا من قروب فؤاد لكن نتعاركو ونتصالحو اللي يحب يسامح

آنا : ايه صح

" لما خطر علي بالي هالموقف وقف تفكيري للحظة , كله مر في ثواني كلامنا واتصالها واللي قالته كل شي وكيف كم مرة جتني بنت ع الفيس وتعرفت علي وقالتلي انه من طرف فؤاد وقالتلي ردي بالك منه وتنصح فيا وانه يحبني , جزء مني كان خاطر يعيش قصة حب حلوة , ممكن مع فؤاد لان الي الان ولد كوي سالا اني مازلت نحس كل شي مش صح ولاني بنت ثقتها لنفسها وووبس"

نونة : اسيل كنك سكتي

آسيل : ههه لا شي بس خطر علي بالي كلام ابتسام بس

نونة: اها مازلتي تكلمي فيها

اسيل : لا مرة مرة مسج بس

نونة : ايه اوك ياناري عليه فؤاد حاسة اني حاسة بشعوره وشن صارلي مع عبدالله

اسيل: ايه ايه الحمدالله ذكرتني نبي نرعف قصتك بالتفصيل قداش ليا نراجي في وقت باش نحكو في الموضوع الا ان ديما مايصيري وتوا  قولي من البداية

نونة : البداية عارفتها انتي " وسكتت لاني بجد حاسة بصحبتي نونة حبت عبدالله بجد ومن قلب " والمهم بعد ماكلمته لــ 6 شهور وعلي عيد الفطر تخيلي تعاركنا وماعيدش عليا .وبدا الموضوع من رمضان لما اسلوبي قالي مش عاجبه وقلتله حتي انا ومافهمتش الا وانا معاش نكلمو في بعض

اسيل : مانعرفش اعلاش تحبيه يانونة حتي شكله مش حلو وهدا انا شايفته في صورة امالا علي الطبيعة كيف وانتي شفتيه مرة وحدة

نهي: يااسيل مش هكي ومش ع الشكل وبعدين هوا حلو غير انتي ذوقك غير وانا انحبه ومش لازم نشوفه ديما

اسيل : لا حبيبتي ضروري وبعدين هوا ضعيف ومش طويل كيف هكي قصدي مادام انساك انسيه

نهي : فوتي الموضوع وخلي نشوفك مع فؤاد شن حتديري

اسيل / هخخخ مش حندير شي

ومر اليوم واكيد رجعت وانا ماما علي خلاف لاني سكرت داري وكنت نكلم في ولد عمي وماما حست بيا ورقدت وانا متضايقة من تصرفاتها وبعد ساعتين وفي الساعة 11 فتحت ايميلي الي فيه اسامة بس كان اوف ..ولقيت هلبا ناس اون فشفت المذكرة باش نتذكر منهم لانهم هلبا ونسيت نصهم فلما غيرت من اوف لــ اون جوني هلبا شاتات من بينهم واحد اسمه نادر كان من نفس عمري بس يقراا في الثانوي ولاني خاشة بكري فانا سابقته ونقرا جامعة .....فلما مليت من كلامهم بعتلهم كلهم مشغولة وشوي ونجي وبعد نص ساعة منهم اللي سكر ومن مازال اون ..وانا كنت ع الاغاني فطلعلي شات منه نفسه وقالي كملتي ولا مازلتي مشغولة ’ , فانا ضحكت علي رده لان في منهم بعتلي بز وفي منهم قالي تصبحي علي خير وسكر وعلي اساس مازلت مشغولة الا حركته هو ضحكتني وقررت تهدرز معاهـ

آنا : شكلك كنت تستني فيا ^(^

نادر : ايه وكنت ع الفيس بس قلت نشوفك رجعتي ولا لا

وكملت كلامي معاه كان اسلوبه حلو وقالي اسمه ومواليده ولقبه ومن وين هوا وهدا نصه سجلته من اول مرة حكيت معاه

وبعدها فتح اسامة وهدرزت معاه ع السريع وقالي ان صحبتي كلماته اول امس وشن صار بينهم وانا مشيت علي اساس هدا اللي صار ومع الساعة 1 رجعت رقدت من جديد لان عندي جامعة الصبح

\\\\\\\\\\\\\\\\\\\\\\\\//////////////////////////////

اليوم التاني وفي المحاضرة كانت محاضرة عربي وخليت نهي تحضر معاي مع ان جدولها غير

وآكيد نبي نجرب شعور الطلبة مش المنتبهين ولاني مليت من كلامه فتحنا الماسنجر انا وياه

وشفت الفيس وكان عندي فضول نشوف شن دار فؤاد وشن كتب علي صفحته ولانه هوا ديما أي شي يصير يديرله نشر .......فالقيت ان امس صور صورة جديدة في الحديقة وكاتب انه حيبدا حياة جديدة وخلاص حينسي اللي فات وكلام تابع بعضه فانا نوعا ما انقهرت او علي كلام نهي غيرتي لانه قرر يبدا شي جديد ولاني نحب التملك فانا مازلت نبيه نفس اول مرة قلتله خلينا نكونو اصحاب بس وتذكرت شن صار وقتها

هالكلام كان في شهر 7 بعد شهر من تعارفنا وموضوع الارتباط

( فؤاد بجد انا مش حنقدر نرتبط بيك انا مش هكي ومش من هالنوع من البنات وكان رده انه مصر وعشان هكي ارتاحلي وان هالاحساس اول مرة يحس بيه حتي انه بعد ماحس اني مصممة تاني يوم بعت اقرب صاحبين ليه وكلموني برسائل وشرحولي قداش يحبني وانه ماعندش بنات تانيين في حياته غيري والدليل قدامي , الاول اسمه هشام كان ضايفني وحكيت معاه  كم مرة وكان ديما يقول يافؤاد حضك حلو بااسيل والتاني اول مرة يبعتلي رسالة لما قاله فؤاد كلمها وقولها قداش نحبها وبعتها في نفس الوقت لما قررت اني نقوله خلينا اصحاب وكان سمير بطبعه خجول واسلوبه وقتها كانه بجد متدين يعني كان يحكي معاي باسلوب يااختي وبالنصائح , وبعد اقناعهم قررت اني ماننهيش كل شي )

فلما تذكرت بجد انقرهت لاني مازلت نبي نكونو غير لكن مانقدرش الوضع مش طبيعي ..........

فقلت لنهي انها تكلمه وتبعتله بالاكونت الجديد اللي درته لها امس وحكت معاه لان بالصدفة لقيناه اون لاين ’ تقريبا كان عنده محاضرة حتي هوا ,

نهي : باهي كويس يافؤاد وان شاءالله حياتكـ تكون احلي وجديدة ديما

فؤاد: شكرا يانونة وربي يساعدني

وانا اكيد كنت متابعة لكلامهم اول باول .......انتبه لينا الدكتور لكن لانه يعرفني مؤدبة عادة فقال بلهجة ضحك انتبهوا وسيبوا الموبايلات اللي واخدين عقولكم , الا ان انا وياها استمرينا وخليتها تكلمه من ايميلي وقالتله ان انا في المحاضرة وهيا عندهآ موبايلي وهوا من كلامه سلم عليا ووصاها انه تقوله ان يسلم عليا وانا نشوف في التعليقات ونقوللها شن ترد .........

ومرت الساعة ونص بسرعة وانا مش منتبهة لاي حرف من المحاضرة واكيد لان الوقت قريب يجي ع الساعة 2 فانا كنت في اخر حالات النشاط لان هدا موعد نومي المعتاد فكنت نستني بابا باش يجي ...........

********************************^_^******************************

********************************^^******************************

بعد شهر من اخر حدث مهم , اما الباقي مر عادي انا وماما نفس الحالة مختلفين مرة مرة نكلم في ولد عمي , وكل يوم متابعة صفحة فؤاد باش نشوف شن الجديد من صورهـ وتعليقاتهـ ومرة مرة نعلق علي حاجة مع اني المفروض نخلي الولد في حالهـ الا آآاني ماقدرتش كنت نبيهـ يحبني آآآانا وبس حتي لو سيبتهـ ومانبيهش يكلم غيري بسرعة ’,,كنت انانية بشكل كبير ..

وفي نفس الوقت اهتمامي بقرايتي في تناقص ملحوظ رغم نصائح بابا اللي عادة كلامهـ اآآوامر بالنسبة ليا ......وكنت كل يوم نكلم في نادر واسامة ع الياهو مسن ..كان آاسامة شخصية غريبة مش بااسلوب فؤآآد اللي لو نبي نوصفها حنحطهـ تحت كلمة {محترم} كان كانهـ من العصبي من النوع اللي يمشي في الغلط ومعاندي’, ونفس ماقالي عندهـ في القرصنة واللي تعلمها من منتدي سعودي وهداآ كان رآابط بينا لاني قبل الفيس كنت مشتركة في منتدي سعودي حتي آانا وكنت نحب موضوع الهاكرز , وكان عندهـ في تصميم المواقع وآاغلب الوقت ع النت فكنت اآغلب وقتي نحكي معاهـ وبجد عنده شخصية تجذب

...

شفتو التناقض بينه وبين فؤاد اللي هوا شخصية طيبة ومحترمة وهادية ورومنسية وبين اسامة اللي نوعا ما العكس تمام لكن كنت نحب كل شي فيه كان يعصبني بس يعجبني , نكره اسلوبه الحاد بس يجذبني وطبعا كان هوا وفؤاد من نفس القروب ....,

"" كنت حاسة ان الموضوع نوعا ما لعبة بين فؤاد واسامة وان اسامة كلمني عشان فؤاد قالهـ هكي مع ان فؤاد مش من النوع اللي يجرب اللي يحبهـ , وآاحساسى التاني ان فؤاد من كثر ماكاتب في صفحته انه يحبني وان انا اهم شي عنده فشكيت ان اسامة ولانه شخصية غريبة يبي يتحدي فؤاد او غار منهـ او يوريهـ ان البنت اللي يحبها مللك ليا آآنا !!!! الخلاصة ثقتي في اسامة كانت صفر وجزء مني حب شخصيتهـ  وجزء يبي يشوف هل شكوكي في محلها ’,,والجزء الاكبر حبى لنفسي !!!!

آما نادر فهو غير , اآنا عادة لو كلمت حد طول نشوف مميزاتهـ ونحطهـ في خانة ممكن يكون حب حياتي بس نادر, غير نادر كنت نحكي معاهـ لان آنا نحب نحكي معاهـ , مافكرتش فيه كاصاحب او انا وهوا في علاقة , لا كان كل شي عفوي بيناتنا ...وهدا احلي شي وممكن السبب الاكبر ان انا سابقته في الدارسة وانا مش من المعجبين بفكرة نحب شاب اصغر مني مع ان اسامة اصغر مني بشهر,

ونادر لمح مرة انه من مواليد نفس السنة لكن بشهر 12 بالتالي اصغر مني لكن قالي ان كلامه مش جد وهوا من مواليد شهر 2 فاكلامه كان عادي ومعطيتاش اهمية كبيرة ......

\\\\\\\\\/\\\\\\\\\\\\\\\\\\\\\\\\\\\\\\////////////////\\\\\\\\\\\\////////////

وبمرور الوقت وصل موعد امتحاناتي بسرعة وكانت بداية 12

..............................

ولاني فهالفترة شخصيتي متقلبة ونبي نجرب كل شي في وقت وآآحد فعلاقتي رجعت من جديد مع فؤاد الا اني ركزت علي عنواآن الصداقة  ( وقتها كنت نحب آلصدآقة بين البنت والولد لان نحسها مرآت تكون شفآفة آكثر من علاقة جنسين مع بعضين , وبآلاخص في موضوع الدرآآسة لان البنت ممكن تضمن وثتق في الولد آكثر من البنت اللي نفسها واللي ممكن تكون بدل زميلة او صديقة , منافسة ليها , بالتالي عاجبني هالشي )

, وهدا عشان من كم اسبوع اتصل بيا وانا في الجامعة وقالي ليش مش ممكن تحبيني هل في حد في حياتك تحبيه غيري او هل عشان اسامة قالك يبيك فقتلهـ ,كيف :قالي اسامة

قالي ان انتي تبي , ترتبطي  بيه وانك تحبيهـ فوقتها عصبت من اسامة ومن كلامهـ وكلمتهـ { لان هكي شكوكي كانت حتكون صح وآن الموضوع مجرد لعبة }..

بعدها حكيت مع آسآمة :

وقلتلهـ شن قلت لفؤاد قالي قلتله ان انا نلكم فيك وهل عادي اني نكلمه وبالاخص وانتي كنتي صاحبتهـ من قبل فآ عيب الولد يعرف من برآآ >> ملاكـ صح , حسسني يهتم بفؤآد

فاوقتها ماعرفتش من نصدق لكن لاني حسيتهم يبوا يلعبوا فقلت خلي نلعب معاهم وانا شن خاسرة , الا اني بيني وبين نفسي كان عاجبني اسامة بجد

حتي فؤاد لكن مش عاااااااااااااااارفة !!!!

فا في يوم من كلامي انا وياه اتفقت اني نشوفهـ لاني حبيتهـ كله علي بعضهـ كان عاجبني بشخصيته وكلامهـ كل شي...

وصار وكان موعد اني نشوفهـ 15/12 وشفتهـ كان عادي لكن حبيتهـ ,مر اليوم بسرعة كآن بجد عاجبني الجو وفي الاول كنت نبي نشوفهـ عشان نحس هل يلعب بيا او لا

لكن ..............

لكن اسامة طلع غير صح يبان عليه ان هادي لكن هوا العكس وبجد تحس شخصيته معقدة

كان آسمر طولهـ عادي بالنسبة لعمرهـ , وكانت ملامحهـ حادة

ومن كلامنآآ

كنت رافضة ان نكونو في علاقة لانه اصغر مني بشهر مع انه قال هدا سبب تافهـ لكن هادي  شخصيتي ومع هدا ..

حبيته او يمكن حبيت فكرة في واحد جديد في حياتي وتجربة جديدة

........

وآكيد تنآقشت آنا والبنآت في الموضوع

آنا : ^_^ بصرآحة آهوو تحسيهـ كويس يعني عآدي

آسمآء : آنتي نفس البنت اللي بكري قالت , آول ماحنشوفهـ طول حنعرف يكذب آو لا ؟

نهي : آيه صح حبيبتي شني رجعتي في كلامك ولا آهوو ^^

آنا : لا مش هكي , خيركم آنتو , القصة ومافيها آنا مش مرتاحة 100% لكن في نفس الوقت عادي مازلت حاطة آحتمالاتي

اسماء ونهي : آيهـ آيهـ

سوسن : آوكـ خلو البنت برآحتها , لكن الولد كويس مش حلو هلبا ولا شين هلبا

نهي : الجمال جمال الرووووووح

آسماء: عادي مادامهـ البنت عاجبهـا شن دخلكم آنتو

آنا : ماتدوريش مش مهم توآ

-------------------------------+

..................................

ومع اني اغلب وقتي معاهــ الا اني مرات نكلم في نادر كصديق وبهالوقت ومع انتهاء اسبوع امتحاناتي حيبدا اسبوع امتحانات نادر وهوا اخر سنة شهادة الثانوية ووقتها عطيته رقمي فكان مرة مرة يكلمني لاننا اصدقاء لا اكثر وكان صوته في اول مرة كلمته غريب ...ضحكني لاول مرة بس شخصيته حلوة بشكل مش عادي كان من النوع الاجتماعي واللي يقدر يحكي بلا حدود....

وانا حطيت السبب لانه مرتبط لاربع مرات وماصارش منهم لاسباب مختلفة فهدا اللي خلاني مانثقش فيه وحتي لانه من النوع اللي يحب يكون عندهـ اضافات بنات كان انعكاس لي فهدا سبب الثقة الصفر

في يوم امتحاناته كان النت كامل كرته عندهـ وكان يكلمني كل يوم , كان كلامنا عادي شامل في شن صار في امتحانهـ ومواضيع مختلفة

الا اني انحب اتصالاتهـ بس حب عادي , شعور عادي جدا كان كصديق فقط

في يوم خديت موبايل ماما عشان يكلمني عليهـ وموبايلي فاتحة المسن عليه لان لاب توبي ممنوع عليا وقتها

وقلت لماما حنكلم صحبتي ........

فاالبصدفة كنت حاطتهـ ع السرير بجنبي لما رن وماما خشت فاقتلي حنرد انا وانا كنت عارفة انه نادر مش صحبتي هنادي

ماما: ايوا

نادر: غير خيرك تكشخي

ماما : نعم

وشافت جيهتي فارتبكت انا وعرفت ان اليوم مش حيمر علي خير وبالاخص وماما بدت تضحك

نادر: عفوا بس نبي عبدالله نبي نساله علي الامتحانات

وبالصدفة عبدالله كان اسم خويا

ماما : باهي لحظة بس

وعطت الموبايل لخويا .....وانا كنت الوان والارتباك بانواعه ولما شفت ماما طلعت من عند خويا ومشت لبابا باش تقوله فانا بعتله مسج انه مايتصلش

اول مرة ننحط في موقف هكي وكنت خايفة من ردة فعلها

فجت ماما وخويا عندي

ماما : من هدا اللي مسميته باسم صاحبتك طول عمري وانا حاسة هنادي وراها مصايب

عبدالله : منو هدا اللي متصل وقالي نبي اوراق امتحانات واعلاش مسجلته باسمك

آنا عادة لما ننحط في مموقف نضحك فامعاش عرفت نرد

ماما: هاتي موبايلك ومعاش في موبايل الا لما تمشي للجامعة

وخويا مشي لبابا اما انا مسكت موبايلي بقوة ومعاش عرفت نرد لان كيف حنكذب ومرات تكلم بابا وانا مانقدرش نكذب علي بابا ابدا , ساد ان من عنادي لماما خنت ثقت بابا ...

فصدمني..................

.

.

.

.............

صدمني

 رد بابا اللي قال عادي خلي موبايلها عندها بلكي هدا خو صاحبتها وانا كنت نضحك بروحي وانها مشت علي خير وماما طلعت من عندي معصبة , آكيد حتحاسب بابا علي قالهـ 
اما انا اتصلت بيه وكنت نضحك وهوا كان خايف ومرتبك تقريبا ويسال شن صار معايا وقالي شن قال لماما ولما زبط صوتها قالها نبي عبدالله وبالصدفة طلع اسم خويا وقاله معلش غالط 
وتم الموضوع وبعدها سكرت ورقدت وانا نضحك بروحي .0..............
الغريب الي الان مش عارفة اعلاش بابا رد هكي او ليش ماما مشت الموضوع ’’
..............
هالشي رجعني للقطة صارت الشهر اللي فات لما كنت في الجامعة وكانو صحباتي كل وحدة حاطة نغمة رومنسية لصاحبها وصور وغيرهـ
فاانا كنت نحب ع بالي حبيبي فحطيتها لفؤاد وحطيتله صورة جاستن تيمبرليك ولنادر حطيتله صورة جاستن بيبر لانه ديما يذكرني بيه وكيف صورته اللي مرة حطها ع الايميل ونغمة كيشا tik tok 
واسامة حطيتله صورة عادية ونغمة تامر حسني انا ولا علي بالي ...........
فافي يوم موبايلي كان علي سريري وانا كنت في الدور الاول وعبدلله يلعب بجهازي فارن رنة وسكر وقال::
عبدالله : اسيل موبايلك يرن شكلها صاحبتك
انا استغربت لاني حطيته علي مود اوف لاين اانا : باهي اوك سكر وحنرد عليها بعدين 
وكملت مسلسلي
عبدالله : باهي بس صاحبتك اللي حاطتلها نغمة ع بالي حبيبي وحاطة صورة جاستن عرفتيها 
فانا ارتبكت وسمعت صوت ماما بجنبهـ
انا : باهي باهي بعدين 
وكيف انه نزل وقالي خودي موبايليك وشوفي صاحبتك وبصراحة ماتوقعتكش هكي ياااختي "" هالكلام ماهزش فيا وقتها ولا شي عادي جدا , بجد اللي يمشي في الغلط معاش يفرق معاهـ الصح ""
وماما شافت فيا وسيبتني ــــــــــــــــ
ونفس الشي الموقف مشي بتحقيق من ماما تاني من هدا وكيف تعرفتي عليه ومش هكي يابنتي الادب والاحترام 
لكن كنت خاطري نقوللها الدافع الاكبر انتي ياماما انتي اللي خليتيني ندير هكي..بس وقتها كان سببي مش ماما نفسها سببي التجارب الجديدة {{/* .......ووضحتلها انه هوا مجرد صديق معاي في الجامعة فردت مش مفروض نعطيه رقمي نحنا عطيناك الموبايلك باش نطمنو عليك مش باش تعطيه لزميلك ..
ومر الموضوع بسلاسة وبنصائح مشت في وقتها !!!!!
..................................................
وفي يوم 29/12/ كان موعد اني نشوف نادر بعد الحاحات وكم مرة طلب انه يشوفني فاوافقت ولاني نبي نشوفه حتي انا مع ان صورته .كانت عادية مش كان حلو هلبا 
وشفته مع الساعة 4 في الجامعة طبعا لغيت محاضراتي .,عشانه بس كان يستاهل لانه طلع حلو بشكل كبير احلي من اسامة وفؤاد حتي,

وكان 

يهبل يهبل يهبل

 كان حبوب وجنان بجديات كان غير كان من احلي ايامي الي الان ’,
.0.................وهالشي قربنا اكثر وبالاخص ان اسامة مسافر هو واهلهـ فكان مايفتحش في النت ويكلم فيا كل يوم بس مش نفس قبل ...واللي يميز اسامة انه صوته حنون وناااااااااااعم 
يحسسك بهدوء غريب عكس هالشخصية وهالاختلاف اللي فيه ..............
................................................
فافي يوم 31/12 كانت نهاية سنة وبداية جديدة 2011
مع ان 2010 كنات غير الا اني واجهت فيها تغييرات كبيرة غيرتني جذريا 
فمن طلعاتي فهاليوم مع العيلة ولان نوعا ما مش حنحتفلو بالكريسمس لكن كبداية لسنة جديدة ,
مع الساعة 11 كلمني اسامة كنت انحب اتصالاتهـ نستني فيهم بالوقت وحكينا وقالي حيكلمني بعدين لان امه تبيهـ 
لما سكرت وقعدت ع الاغاني في قناة fm واحتفالات الكريسمس في العالم وبابا كان مسافر وماما وخوتي كانو في الدور التاني وانا كنت واخدة الارضي بروحي فخلاني نكلم براحتي وقتها اتصل نادر 
وكلمته للساعة 12 وربع وبدينا السنة الجديدة مع بعض وقتها بعد ماسكر بعتلي 
المسج الاول 
""""" 

في موضوع في راسي شاغلني وانتي الموضوع فاشن رايك الحل

"""" علي حسب مانتذكر 
والتاني "" كل عام وانتي بخير وانشالله عام جديد وانشالله العام الجاي ’مع بعض "" ممكن في اختلاف بسيط في طريقة السرد لكن المغزي نفسه 

واللي يقصده بالمسج التاني ان نكونو مع بعض في 2011
ولاني قايلتله اني حاليا في شخص في حياتي وكنت نقصد اسامة ’
..................
وببداية شهر واحد والعطلة وبمرور شهر علي علاقتي بااسامة الا اني قررت ننهيها ولما رجع من سفرهـ قال انه استاحشني ويبي يشوفني فاتفقنا انه نتلاقو 
.....................
ولما تلاقينا واللي استمر لربع ساعة بس لاني قلتله ان نحنا المفروض نكونو اصحاب وبس فاهوا استغرب وقرر انه بيمشي 
ماكلمتش يومها لانه نبيهـ يفكر ,آو لانهـ عصب ومشي بسرعة , بدون آي رد , 
وتاني يوم كآن الجو روووووعة وآنا من محبي " الشتاء" فصبت المطر والبرد والمنآظر تعطيكـ آحساس حلو \
فاقررت نكلمهـ لانهـ عيب ديما هوآ يكلم ويسآل حتي لو تعاركنا آو انا اللي غلطت 
لما كلمتهـ عاتبني قالي اني ماسالتش عليهـ او عطيتهـ أي اهتمام وكيف يبينا نكونو اصحاب وهوا يحبي 
استحالة هالشي يصير وبعد اسبوع وانا نقنع فيه هدي وقرر انه يبي يكون في حياتي حتي لو كان صاحب وبس 
\///\\\\\\\////////////\\\\\/
في هالاسبوع اللي مر مكالاماتي قلو بنادر وانشغالنا في العطلة , اما فؤاد فالاني مافتحتش النت لفترة وبالاخص بعد مع علاقتي بااسامة انتهت معاش حبيت المسن ولان نادر انشغل ففؤاد ماكانش يتصل هلبا وانا نفس الشي ,ـ
\/\/\/\\/\/\/\\/\/\\/\/\/\/\/\/\/\/\/\/\/\/\//\/\/\/\/\/\/
مر شهر واحد بسرعة تقريبا اتصالات نادر كانت معدودة واسامة اقل منه

وببداية شهر 2 كانت الامور عآدية وبصرآحة ولان همي نفس هم آغلب جيلي وهوا المتعارف عليهـ , ف

الجزيرة والحرة والعربية

كانو من القنوات المخصصة لبابا وماما فقط 
وتقريبا كنت مجردة من المعلومات عن الثورتين " تونس ومصر" 
وبتآريخ 

14 /2 /2011

 كنت طالعة مع خويا ومرتهـ , مر يومنا حلو الا آن بتركيز خويا علي حاجات مرتهـ تعبتني 

ولاني مش متعودة نطلع معاهم , 
وبرجوعنا من السوق مرينا علي مظاهرة الامهات والشباب علي الناس اللي ماتوا في بوسليم 
ونفس الشي ماكانش عندي اي معلومات ولاني منقطعة عن الفيسبوكـ فااغلب المنشورات فاتوني ...
المشهد آول مرة نشوفهـ , آمهات زعلانين علي دم آولادهم اللي مشي بدون سبب والشباب والرجال من وراهم وكانو يرددو في كلام مافهمت منهـ شي 
وآنقدني خويا بتفاصيل عن اللي صاير , وكانو كلهم يصورو وزحمة الطريق , 
وآشتد الموضوع مع الايام وبدت الثورة تبآآآن
الاجواء غريبة ومتوترة وبالاخص يوم 17 /2 اللي غير بلادي من الاساس وكانت الامور غير طبيعة والاحداث والشباب الاحرار اللي قرروا يحطو حد لمعمر
فاوقتها وفي هاليوم بعد خطابات والتهديدات وكانت الشوارع تخوف واكثرها حرائق ومظاهرات وضرب برصاص فكانت كل عيلة تجتمع مع باقي عيلتها وطلوع كان ممنوع حتي الحياة الطبيعية توقفت وتوقفت الدراسة والعمل وكل نظام تغير مطالبة بتغيير القائد وتنحيته 

ففي هالفترة زاد تعلقنا بالقنوات الاخبارية ومعرفة شن صاير ببلادنا وشن الاحوال وحالات الاغتصاب والقتل والترهيب اللي صايرة 
ويوم 18/2 جاني اتصال من صاحبتي هنادي 
هنادي : الو ......اسيــ ــــل ....
خوفني صوتها المتقطع وواضح صوت البكي 
انا : هنودة شن صاير انتي كويسة اهلك كويسين 
هنادي : ...........ايه ............بس
انا :اهدي عشان خاطري خوفتيني وقولييلي شن في 
هنادي : ...البقية .....في عمرك .........بـــــــــــا
انا خفت لما جابت سيرة الموت 
انا : الله يرحمه من اللي توفي احكي اعصابي اتحرقو
هنادي : بو ..........بات نهي توفي يااااسيل ........0 
كنت مرتبكة وشوي بنبكي شعور مختلط بو نونة اغلي صحباتي توفي اعز انسان هيا تحبه واكثر واحد مهتم فيها 
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
دنيا غريبة وانا عادة مرات نضحك لما نشوف موقف غريب قدامي او تجيني حالة هستيريا 
فطلعت لماما وضحكت وقتها كانت معاها عمتي فقالت شن في 
انا : ههع نهي ............نونة ...........بوها توفي ياماما " وكنت نحكي بسرعة وحالتي غريبة "
ماما سكتت ولانها تعز نونة هلبا فقالت لاحول ولا قوة الا بالله وعمتي بجنبها مع انها ماتعرفش صحبتي الا انها بدت تبكي وماما تهدي فيا انا لما شفتها تبكي كان بركان وانفجر وبديت نبكي بهستريا انعسكت من حالة الضحك 
ونتذكر يومها رقدت وانا مازلت نبكي علي اللي صار لاغلي انسانة في حياتي
//////////////////////////////////////////
تاني يوم نضت وصليت وتعوذت من الشيطان ولان صاحبتي واهلها مسافرين لبوها اللي توفي برا البلاد فعزيتها بالموبايل ومر هاليوم حزين وكئيب علي وانا نفكر كيف حتدير بدون بوها ولان هوا اقرب شخص ليها وكنت خايفة عليها ومشاعري متلخبطة واللي هون الموضوع صحبتي جت وباتت عندي يومها ومر يومنا اللي علي صحبتي من

اسوء ايامها

 !!.
\\\\\\\\\\\\\\\\\\\\\

يا بلادي حبك موالي... 
وعليك والله ما يغلى غالي ...
يا بلادي يا حلوة...
يا نسمة حنان و غنوة ...
أنا عاشق و إنت النجوى ...
إلي ساكنه فكري و خيالي....
بعيونك إنت نشوف بويا و أمي و حببتي...
طفلي بكرة و ضحكت بنتي ...
و تراب جدودي الغوالي ...
يا بلادي حبك موالي...
وعليك و الله مايغلى غالي...
تاني يوم نضت وصليت وتعوذت من الشيطان ولان صاحبتي واهلها مسافرين لبوها اللي توفي برا البلاد فعزيتها بالموبايل ومر هاليوم حزين وكئيب علي وانا نفكر كيف حتدير بدون بوها ولان هوا اقرب شخص ليها وكنت خايفة عليها ومشاعري متلخبطة واللي هون الموضوع صحبتي جت وباتت عندي يومها ومر يومنا اللي علي صحبتي من اسوء ايامها !!.
\\\\\\\\\\\

\\\\\\\\\\
اللي بعده اتصل بيا 
هو هو نفسه اتصل بيا قدااش استاحشته ليا فترة عليه .......فهالفترة نحس مرات مشاعري اتغيرت اتجاهه 
وبالاخص قبل يومين بعتلي 
+ آنحبك واللهي انحبك كيف نخليك تصدقي بس اني انحبببببببك +
هالمسج غريب ماتوقعتش انه حيبعته وبالاخص مر في بالي انه كسد ويبي يكسد عليا 
فرديت 
+ !_!+
وشوي وبعتلي 
+ نقولك انحبك تبعتلي !_! معقولة هكي تي انحبك عارفة شن معناها +
وطول الليلي وانا وياه مسج ورا مسج هوا يشرحلي وانا نقوله كيف انحبك وانا مش حاسة بشي 
وبجد هدا كان احساسي وصح اني كنت نكلم فيه لكن , مانقدرش نكدب في موضوع الحب بالذات !!!
++++++++++++++++++++

++++++++++++++++++++++

هو نفسه اللي خياله مستمر معاي الي الان 
هو نهاية قصتي قبل بدايتها هو 
هو " نادر"
اللي في الاول ومن اول شات معاه حسيته عادي ومااهتميتش اللي انا حاليا حرفه في كل مكان في بالي واسمه احلي الاسامي 
هو اللي ديما يخطر في بالي وفجأء نلقي روحي بروحي مبتسمة لانه بس مر 
هو اللي خاطري يكون اقرب حد لي 
هو كل شي .......
++++++++++++++++++

+++++++++++++++++++++++++
غريب لان هالاحاسيس سببها 3 ايام كلمني فيها بعد يوم 20/2 تقربنا بشكل كبير وبالاخص وانا خايفة عليه ومانبيهش يطلع في المظاهرات او يدير شي يضره كت نكلمه للفجر وهادي اول مرة نديرها 
وكنت نحب نكلمه بالساعات الا في اليوم الثالث 
لما ماكلمنيش بكل فارنيت عليه لقيته مشغول في الساعة 2 في الليل , استغربت لاني اللمفروض نكون انا بس الوحيدة اللي يكلمها قلت ممكن مع واحد من اصحابه ورنيت مرة اخري ومازال مشغول 
بعدها كلمت اسامة واطمنت عليه وكيف اخباره وسالني عن فؤاد قلتله اني كلمته امس في الظهر وكان كويس ومع ان الوقت متاخر الا ان نحنا وقتها كان الوقت زي بعضه طلوع ممنوع و24 ساعة ع الاخبار 
فا بعد ساعتين رن عليا مرتين انا عصبت لان بعد ساعتين كيف خطرت في باله ومارديتش 
ورقدت 
تاني يوم صدمني انه مابعتش حتي مسج او مارنش اكثر او أي شي 
فمر طول اليوم وانا نستني فيه يرن لكن لاحياة لمن تنادي ...........
ولان مزاجي كان حلو لما نكلمه فكان حاليا العكس مع اي حد نشوفه قدامي واللي مخوفني ان االاخبار ماتطمنش وحال بلادي يخوف !!
+++++++++++++++++++++++++++
وفي صبح اليوم اللي بعده اكتشفت ان الاتصالات مقطوعة نهائيا واستمر هالحال لـــ 6 شهور عانت بلادي فيها من استشهاد عدد كبير من شبابها ونساءها واطفال وشيوخ واغتصاب المئات وعدد كبير من الشباب بترت اطرافهم والخسائر المادة والبنية للمدن والمعنوية المحطمة واغلب عوائلها هربو منها عشان يحافظوا علي ارواحهم .آخبارنا كانت مليانة بكل المشاعر وهالاحاسيس واصلة للعالم آجمع اللي عرف بلادي وقتها وقداش عانت ومازالت تعاني ....
++++++++++
6 شهور مرو كل يوم كنت نفكر فيه , كيف حاله , وكيف حال آهله , كيف قرايته وهل مازال حي او لا . وندعيله ., 
زعما مازال يفكر فيا ويخاف عليا او لا . كان واخد تفكيري بطوله وعرضه هو وهو بس 
ولكن المفاجآة بعد 6 شهور سآآآلني بكل برود نسيتيني ولا لا ؟؟؟!!!!!
آشرحلي شن معني آحساسي ؟
.......***......



اليوم وآني في نهاية سنة 2011 في 31/12 بالزبط بعتلهـ مسج , الحق ماقدرتش اني نتحكم في روحي
آو نكذب ونقول نسيته , ولان هاليوم في السنة اللي فاتت بعتلي مسج من آحلي مسجاتهـ , حاسة كاآنهم يمرو قدآمي مع آني مسحتهم لما قررت نلغي موضوع الشباب من حياتي , الا آني تقريبا حآفظتهم كلهم ,

من بعد آخر مرة حكيت معاهـ , كانت نهاية الشباب كلهم , كنت محتاجة لهالنهاية وبالاخص وآني عارفة لو آستمريت حنضيع 
ومش حنقدر نتحكم في روحي زي ماصارلي وبعتت الرسالة ليهـ ..............
كنت بجد حاسة بيهـ , كآن بالنسبة ليا كآنه كتاب وقارية كل شي فيه , وممكن آنا كنت نفس الشي , مش عارفة
لكن ومع آن آحلي شخصية شاب شفتها وعجبتني وعرفت آني نحبهـ بعد مدة ..الا آنه لو شبهـتهـ حيكون نفس كل قصة حب في الثانوية لما تكون تعجب او تحب بس عشان انت تبي تحب
مش لشي تاني , وىما اني مش مدورة المادة ولا مدورة كيف خلفيته , همني هو وبس 
وآول ماطلع عندي تم الاستلام كنت نبي نقفل موبايلي او نحطه في مود OFF , لكن سبق برنة منه ,
آنا غيرت رقمي وهدا رقم جديد يعني مش حيعرفه , وكنت وقتها نقدر نرد عليه والغريب مسحت رقمه ومرت فترة طويلة الا آن رقمه كآنه خلفية جهازي !_!
لكن كان قصدي من البداية ومن تفكيري اني نبعت الرسالة , ’اني خاطري فيها ولاني ديما نقوله عفوية وندير الشي بدون تفكير فهدا اللي صار مع الرسالة
وقفلت موبايلي , وكنا وقتها طالعين انا وماما وخوتي لعزومة مامتي . وبابا مسافر لتركيا , فامافكرتش نفتحه من جديد وخليته مغلق...

++++++++++++++++++++++++++++++++



سبحان الله كيف آن بين ثواني ممكن حيآتك تتغير , بعزم وآرادة من سنتين , لكن في هاللحظة صار اللي تمنيته وقدرت نتغلب عليه وآني نكون البنت اللي بجد في قلبي حسيت آنها آنا وتغيرت آهدافي لهدف وآحد فقط هو................آآرضاء الله عز وجل !

نظرتي للدنيا غير ...!!

صفحة وطويتها .. آخترت الخلود وتنازلت عن الدنيا ....

يارب ووفقني ...

....

نهـ ـاآية فصل التجربة "الخطآ " من حيآآتي

وآمنيتي نجتمعوآ في جنآآتهـ 
يكون معآآي 
في الوقت اللي كل شي دآآيم . ونقدر نحكيلهـ 

آحسآسي

لكني مادمت حية , فهمي رضى 

ربي